Auto Strike: హైదరాబాద్ నగరంలో నవంబర్ 30న ఆటోల బంద్కు మహాత్మా గాంధీ తెలంగాణ ఆటో డ్రైవర్స్ జేఏసీ పిలుపునిచ్చింది. ప్రభుత్వం పెంచిన ఆటో మీటర్ చార్జీలను తక్షణమే అమలు చేయాలని, అలాగే గ్రీన్ క్యాబ్లను నిషేధించాలని డిమాండ్ చేస్తూ ఈ సమ్మెకు దిగుతున్నట్లు ప్రకటించింది. రాబోయే 15 రోజుల్లోగా తమ డిమాండ్లను ప్రభుత్వం పరిష్కరించకపోతే బంద్ ఖాయమని, అప్పటికీ సర్కారు స్పందించకపోతే రవాణా శాఖ మంత్రి పొన్నం ప్రభాకర్ తన పదవికి రాజీనామా చేయాలని జేఏసీ హెచ్చరించింది.

Auto Strike: గ్రీన్ క్యాబ్లు, బైక్ ట్యాక్సీలను నిషేధించాలి
సోమవారం హైదర్గూడలో ఏర్పాటు చేసిన మీడియా సమావేశంలో జేఏసీ కన్వీనర్ మహమ్మద్ అమానుల్లా ఖాన్ మాట్లాడుతూ ప్రభుత్వ తీరుపై ఆగ్రహం వ్యక్తం చేశారు. నగరంలో గ్రీన్ క్యాబ్లకు అనుమతి ఇవ్వడం వల్ల లక్షలాది మంది ఆటో, ట్యాక్సీ డ్రైవర్ల ఉపాధి దెబ్బతింటోందని ఆవేదన వ్యక్తం చేశారు. గ్రీన్ క్యాబ్లను తక్షణమే నిషేధించడంతో పాటు, బెంగళూరు తరహాలో హైదరాబాద్లోనూ బైక్ ట్యాక్సీలను పూర్తిగా రద్దు చేయాలని ఆయన ప్రభుత్వాన్ని కోరారు.
ఎన్నికల సమయంలో ఆటో డ్రైవర్లకు హామీ ఇచ్చిన ప్రకారం, ఏడాదికి రూ. 12,000 చొప్పున మూడేళ్లకు సంబంధించి మొత్తం రూ. 36,000 బకాయిలను వెంటనే చెల్లించాలని జేఏసీ డిమాండ్ చేసింది. దీనితో పాటు ఇటీవల దుండగుల దాడిలో ప్రాణాలు కోల్పోయిన ఆటో డ్రైవర్ మహమ్మద్ ముకరం కుటుంబాన్ని ప్రభుత్వం ఆదుకోవాలని, వారికి రూ. 10 లక్షల ఎక్స్గ్రేషియా (పరిహారం) అందించాలని విజ్ఞప్తి చేసింది.
అమలుకు నోచుకోని పెంచిన మీటర్ చార్జీలు
ఇటీవల రాష్ట్ర ప్రభుత్వం ఆటో కనీస చార్జీని మొదటి 1.6 కిలోమీటర్లకు రూ. 30గా, ఆ తర్వాత ప్రయాణించే ప్రతి కిలోమీటర్కు రూ. 14గా నిర్ణయించిన విషయం తెలిసిందే. అయితే, ఇందుకు సంబంధించిన అధికారిక ఉత్తర్వులు వెలువడి చార్జీలు ఇంకా పూర్తిస్థాయిలో అమలులోకి రాకపోవడంతో ఆటో డ్రైవర్లు తీవ్ర అసంతృప్తి వ్యక్తం చేస్తున్నారు. నవంబర్ 30 లోపు ప్రభుత్వం సానుకూల నిర్ణయం తీసుకోకపోతే నగరవ్యాప్తంగా ఆటోలు ఎక్కడికక్కడ నిలిచిపోయే అవకాశం ఉంది.