Hayathnagar Incident: హైదరాబాద్లో విషాద ఘటన చోటుచేసుకుంది. కొత్తగా కొనుగోలు చేసిన సెల్ఫోన్తో ఎక్కువ సమయం గడుపుతోందని తల్లి మందలించడంతో మనస్తాపానికి గురైన ఓ వివాహిత ఆత్మహత్యకు పాల్పడింది. హయత్నగర్ పోలీస్ స్టేషన్ పరిధిలో ఈ ఘటన జరిగింది. మృతురాలికి 25 ఏళ్లు కాగా, ఇద్దరు చిన్నారులు ఉన్నారు. నాగర్కర్నూల్ జిల్లా కల్వకుర్తి మండలం ఎల్లమ్మ రంగాపురం గ్రామానికి చెందిన కృష్ణయ్య, అలివేలు దంపతులకు ఇద్దరు కుమార్తెలు. చిన్న కుమార్తె లక్ష్మిదేవి (25)కి నల్గొండ జిల్లా నాంపల్లి మండలం టీపీగౌరారం గ్రామానికి చెందిన లక్ష్మణ్తో ఏడేళ్ల క్రితం వివాహమైంది. ఉపాధి కోసం నగరానికి వచ్చిన దంపతులు హయత్నగర్లోని బొమ్మలగుడి సమీపంలో అద్దె ఇంట్లో నివసిస్తున్నారు. వారికి ఇద్దరు పిల్లలు. లక్ష్మిదేవి తల్లిదండ్రులు కూడా వారితోనే ఉంటున్నారు. భర్త పెయింటింగ్ పనులు చేస్తుండగా, లక్ష్మిదేవి ఇళ్లలో పనులకు వెళ్లేది.
ఈఎంఐలో కొనిచ్చిన కొత్త ఫోన్

ఇటీవల భర్త లక్ష్మిదేవికి ఈఎంఐ పద్ధతిలో కొత్త సెల్ఫోన్ కొనిచ్చాడు. అప్పటి నుంచి ఆమె ఎక్కువ సమయం ఫోన్తోనే గడుపుతోందని కుటుంబ సభ్యులు గుర్తించారు. ఈ క్రమంలో గురువారం తల్లి అలివేలు ఆమెను మందలించింది. ఫోన్ చూస్తూ ఉంటే ఇంటి పనులు ఎలా పూర్తవుతాయని, పనులపై కూడా దృష్టి పెట్టాలని హితవు పలికింది.
Hayathnagar Incident: శుక్రవారం ఉదయం విషాదం
తల్లి మందలింపుతో మనస్తాపానికి గురైన లక్ష్మిదేవి శుక్రవారం ఉదయం భర్త పనికి వెళ్లిన తర్వాత తన ఏడేళ్ల కుమార్తెను పాఠశాలకు పంపలేదు. మూడేళ్ల కుమారుడిని అక్కతో కలిసి టీవీ చూడమని చెప్పి గదిలోకి వెళ్లింది. కొద్దిసేపటి తర్వాత ఆమె ఆత్మహత్యకు పాల్పడినట్లు కుటుంబ సభ్యులు గుర్తించారు. ఈ ఘటనతో కుటుంబంలో విషాదం నెలకొంది. సమాచారం అందుకున్న పోలీసులు కేసు నమోదు చేసి దర్యాప్తు చేపట్టినట్లు సమాచారం.