Kota Neelima: తెలంగాణ ప్రదేశ్ కాంగ్రెస్ కమిటీ (టీపీసీసీ) ఉపాధ్యక్షురాలు కోట నీలిమను ఉద్దేశించి ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ చేసిన వ్యాఖ్యలు రాష్ట్ర రాజకీయాల్లో తీవ్ర దుమారం రేపుతున్నాయి. ఈ వ్యాఖ్యలపై కాంగ్రెస్ శ్రేణులు భగ్గుమంటున్నాయి. ఇందులో భాగంగా సనత్నగర్ నియోజకవర్గానికి చెందిన కాంగ్రెస్ నాయకులు శనివారం తెలంగాణ రాష్ట్ర మహిళా కమిషన్ చైర్పర్సన్ నేరెళ్ల శారదను కలిసి ఒవైసీపై లిఖితపూర్వకంగా ఫిర్యాదు చేశారు. రాజకీయ విమర్శల పేరుతో ఒక మహిళా నేతపై వ్యక్తిగత వ్యాఖ్యలు చేయడం ప్రజాస్వామ్య విలువలకు విరుద్ధమని, ఈ వ్యవహారాన్ని తీవ్రంగా పరిగణించి ఒవైసీకి నోటీసులు జారీ చేయాలని వారు కమిషన్ను కోరారు.

మహిళా నేతల ఆత్మగౌరవానికి భంగం కలిగించడమే: కాంగ్రెస్ ఫిర్యాదు
రాష్ట్ర మహిళా కమిషన్కు సమర్పించిన ఫిర్యాదులో కాంగ్రెస్ నేతలు పలు కీలక అంశాలను ప్రస్తావించారు. సనత్నగర్ నియోజకవర్గంలో మహిళలు, మైనారిటీలు, బలహీన వర్గాల హక్కులు మరియు సమస్యల పరిష్కారం కోసం కోట నీలిమ నిరంతరం పోరాడుతున్న బలమైన ప్రజా నాయకురాలని తెలిపారు. రాజకీయ కక్షలతో మహిళా నేతలను వ్యక్తిగతంగా లక్ష్యంగా చేసుకోవడం వారి ఆత్మగౌరవాన్ని దెబ్బతీయడమేనని ఆవేదన వ్యక్తం చేశారు. ఒవైసీ తక్షణమే తన వ్యాఖ్యలను వెనక్కి తీసుకుని, కోట నీలిమకు బహిరంగంగా క్షమాపణ చెప్పాలని డిమాండ్ చేశారు. ప్రజాజీవనంలో ఉన్న మహిళలకు రక్షణ కల్పించేలా కమిషన్ తగిన చర్యలు తీసుకోవాలని విజ్ఞప్తి చేశారు.
Kota Neelima: పవన్ ఖేరా సెటైర్లతో మొదలైన రాజకీయ వివాదం
ఈ మొత్తం వివాదానికి కాంగ్రెస్ జాతీయ నేత, ఎంపీ పవన్ ఖేరా చేసిన వ్యాఖ్యలే ప్రధాన కారణమయ్యాయి. త్వరలో జరగనున్న ఉత్తరప్రదేశ్ అసెంబ్లీ ఎన్నికల్లో చంద్రశేఖర్ ఆజాద్ నేతృత్వంలోని ఆజాద్ సమాజ్ పార్టీతో ఎంఐఎం జతకట్టడంపై పవన్ ఖేరా విమర్శలు గుప్పించారు. పాత హిందీ సినిమా ‘మైన్ తులసి తేరే ఆంగన్ కీ’ పేరును ప్రస్తావిస్తూ.. ప్రస్తుతం యూపీ రాజకీయాల్లో ‘మైన్ ఒవైసీ తేరే ఆంగన్ కా’ అనే కొత్త చిత్రం నడుస్తోందంటూ ఆయన వ్యంగ్యాస్త్రాలు సంధించారు.
కోట నీలిమ ప్రస్తావన తెచ్చిన అసదుద్దీన్ ఒవైసీ
పవన్ ఖేరా చేసిన వ్యాఖ్యలపై ఎంఐఎం అధినేత అసదుద్దీన్ ఒవైసీ ఘాటుగా స్పందించారు. ఇతరుల రాజకీయ పొత్తుల గురించి మాట్లాడే ముందు పవన్ ఖేరా తన సతీమణి (కోట నీలిమ) రాజకీయ పరిస్థితి గురించి ఆలోచించుకోవాలని కౌంటర్ ఇచ్చారు. గత తెలంగాణ అసెంబ్లీ ఎన్నికల్లో సనత్నగర్ నియోజకవర్గం నుంచి పోటీ చేసిన కోట నీలిమ కనీసం డిపాజిట్ కూడా దక్కించుకోలేకపోయారని ఒవైసీ విమర్శించారు. కాంగ్రెస్ నాయకులు ఇతర పార్టీలపై విమర్శలు మానుకుని, ముందు తమ సొంత పార్టీ అంతర్గత వ్యవహారాలపై దృష్టి సారించాలని హితవు పలికారు.
ఒవైసీ దిష్టిబొమ్మ దహనం – అవాస్తవాలు ప్రచారం చేస్తున్నారని మండిపాటు
అసదుద్దీన్ ఒవైసీ వ్యాఖ్యలను నిరసిస్తూ కాంగ్రెస్ కార్యకర్తలు ఆందోళన బాట పట్టారు. హైదరాబాద్ జిల్లా కాంగ్రెస్ అధ్యక్షుడు సయ్యద్ ఖలీద్ సైఫుల్లా నేతృత్వంలో శుక్రవారం నగరంలో నిరసన ర్యాలీ నిర్వహించి ఒవైసీ దిష్టిబొమ్మను దహనం చేశారు. ఈ సందర్భంగా సైఫుల్లా మాట్లాడుతూ.. 2023 తెలంగాణ అసెంబ్లీ ఎన్నికల్లో కోట నీలిమ డిపాజిట్ కోల్పోయారంటూ ఒవైసీ చేసిన వ్యాఖ్యల్లో ఏమాత్రం నిజం లేదని, ఆయన ప్రజలను తప్పుదోవ పట్టించేలా అబద్ధాలు మాట్లాడుతున్నారని మండిపడ్డారు. బాధ్యతాయుతమైన ఎంపీ పదవిలో ఉండి మహిళా నాయకులపై ఇలాంటి అభ్యంతరకర వ్యాఖ్యలు చేయడం ఎంతమాత్రం సమంజసం కాదని కాంగ్రెస్ నేతలు స్పష్టం చేశారు.