Hyderabad Water Supply: హైదరాబాద్ నగరానికి వేసవిలో తాగునీటి సరఫరాలో ఇబ్బందులు తలెత్తకుండా జలమండలి ముందస్తు చర్యలు చేపట్టింది. సింగూరు, మంజీరా జలవనరుల్లో నీటి లభ్యత తగ్గే అవకాశాల నేపథ్యంలో గోదావరి అదనపు జలాలను నగరానికి తరలించేందుకు ఏర్పాట్లు వేగవంతం చేసింది. మల్లన్నసాగర్ నుంచి ఘన్పూర్ మాస్టర్ బ్యాలెన్సింగ్ రిజర్వాయర్ (ఎంబీఆర్)కు నీటిని తీసుకొచ్చే పైప్లైన్ అనుసంధాన పనులు తుది దశకు చేరుకున్నాయి.
రెండు రోజుల్లో పైప్లైన్ పనులు పూర్తి చేయాలని లక్ష్యం

మల్లన్నసాగర్ నుంచి ఘన్పూర్ ఎంబీఆర్కు గోదావరి జలాలను తరలించేందుకు 1,600 మిల్లీమీటర్ల వ్యాసం కలిగిన మిషన్ భగీరథ–జలమండలి పైప్లైన్ను అనుసంధానం చేస్తున్నారు. ఈ పనులను మరో రెండు రోజుల్లో పూర్తి చేయాలని అధికారులు లక్ష్యంగా పెట్టుకున్నారు. అనంతరం ట్రయల్ రన్ నిర్వహించేందుకు ఏర్పాట్లు చేస్తున్నారు. ఈ పనుల పురోగతిని జలమండలి మేనేజింగ్ డైరెక్టర్ అశోక్ రెడ్డి, మిషన్ భగీరథ ఇంజినీర్ ఇన్ చీఫ్ కృపాకర్ రెడ్డితో కలిసి శుక్రవారం పరిశీలించారు. పైప్లైన్ అనుసంధాన పనుల వివరాలను అధికారులను అడిగి తెలుసుకున్నారు. మిగిలిన సాంకేతిక పనులను త్వరగా పూర్తి చేసి ట్రయల్ రన్కు సిద్ధం కావాలని సూచించారు.
భారీ రాతి పొరలతో పనుల్లో జాప్యం
వాస్తవానికి ఈ నెల 15వ తేదీ నాటికే పైప్లైన్ నిర్మాణం, అనుసంధాన పనులు పూర్తి చేయాలని తొలుత నిర్ణయించారు. అయితే అటవీ ప్రాంతం గుండా వెళ్లే 150 మీటర్ల మార్గంలో భారీ రాతి పొరలు అడ్డంకిగా మారాయి. వాటిని తొలగించాల్సి రావడంతో పనుల్లో జాప్యం ఏర్పడింది. ప్రస్తుతం మిగిలిన పనులను వేగవంతం చేసినట్లు అధికారులు తెలిపారు. రెండు రోజుల్లో పనులన్నీ పూర్తి చేసి ట్రయల్ రన్ ప్రారంభించేందుకు చర్యలు తీసుకుంటున్నట్లు వివరించారు.
ఘన్పూర్ వద్ద జంక్షన్ పనులు పూర్తి
మరోవైపు ఘన్పూర్ ఎంబీఆర్ ప్రాంగణంలో జలమండలి చేపట్టిన పైప్లైన్ జంక్షన్ పనులు ఇప్పటికే పూర్తయ్యాయి. ఈ జంక్షన్ వినియోగానికి సిద్ధంగా ఉంది. మిషన్ భగీరథ పైప్లైన్ అనుసంధానం పూర్తయిన వెంటనే ట్రయల్ రన్ నిర్వహించనున్నారు.
Hyderabad Water Supply: రోజుకు 40 ఎంజీడీల అదనపు గోదావరి జలాలు
ఎల్నినో పరిస్థితుల నేపథ్యంలో సింగూరు–మంజీరా జలవనరుల్లో నీటి లభ్యత తగ్గే అవకాశాలను దృష్టిలో పెట్టుకుని జలమండలి ప్రత్యామ్నాయ ఏర్పాట్లు చేస్తోంది. ఇందులో భాగంగా రోజుకు అదనంగా 40 మిలియన్ గ్యాలన్ల నీటిని (40 MGD) గోదావరి నుంచి నగరానికి అందుబాటులోకి తీసుకురావాలని లక్ష్యంగా పెట్టుకుంది. సింగూరు–మంజీరా జలాలపై ఆధారపడే ప్రాంతాల్లో తాగునీటి సరఫరాకు ఏర్పడే లోటులో సుమారు 50 శాతాన్ని ఈ అదనపు గోదావరి జలాలతో భర్తీ చేయాలని అధికారులు భావిస్తున్నారు. దీంతో రానున్న వేసవిలో నగర తాగునీటి సరఫరాపై ఒత్తిడిని కొంతవరకు తగ్గించేందుకు అవకాశం ఉంటుంది. మిషన్ భగీరథ, జలమండలి అధికారులు సమన్వయంతో పనిచేసి మిగిలిన పనులను త్వరగా పూర్తి చేయాలని ఎండీ అశోక్ రెడ్డి ఆదేశించారు. ట్రయల్ రన్ విజయవంతమైన తర్వాత అదనపు నీటిని నగర సరఫరా వ్యవస్థలోకి తీసుకొచ్చే ప్రక్రియ చేపట్టనున్నారు.