తెలంగాణలో రెడ్ అలర్ట్.. వడదెబ్బతో 22 మంది మృతి

తెలంగాణలో రెడ్ అలర్ట్.. వడదెబ్బతో 22 మంది మృతి
తెలంగాణ రాష్ట్రంలో ఎండల తీవ్రత రోజురోజుకీ పెరుగుతోంది. భానుడి భగభగలతో ప్రజలు తీవ్ర ఇబ్బందులు ఎదుర్కొంటున్నారు. ఈ నేపథ్యంలో రాష్ట్ర వాతావరణ శాఖ పలు జిల్లాలకు రెడ్ అలర్ట్ జారీ చేసింది.
ఆదిలాబాద్, ఆసిఫాబాద్, మంచిర్యాల, కరీంనగర్, పెద్దపల్లి, భద్రాద్రి కొత్తగూడెం, ఖమ్మం, ములుగు, నల్లగొండ, సూర్యాపేట, నాగర్‌కర్నూల్ జిల్లాల్లో ఉష్ణోగ్రతలు 45 డిగ్రీలకు పైగా నమోదవుతున్నట్లు అధికారులు తెలిపారు.
తీవ్ర ఎండల ప్రభావంతో రాష్ట్రవ్యాప్తంగా వడదెబ్బ కేసులు పెరుగుతున్నాయి. ఇప్పటివరకు వడదెబ్బ కారణంగా 22 మంది మృతి చెందినట్లు సమాచారం. ప్రజలు అత్యవసరమైతే తప్ప మధ్యాహ్నం సమయంలో బయటకు రావద్దని వైద్యులు సూచిస్తున్నారు.
ఉదయం 11 గంటల నుంచి సాయంత్రం 4 గంటల వరకు ఎండ తీవ్రత అధికంగా ఉండే అవకాశం ఉందని, ఈ సమయంలో నీరు ఎక్కువగా తాగడం, తేలికపాటి దుస్తులు ధరించడం, పిల్లలు మరియు వృద్ధులపై ప్రత్యేక శ్రద్ధ తీసుకోవాలని అధికారులు హెచ్చరించారు.