One Health Conference Hyd: ఏపీహెచ్వీ 17వ ద్వైవార్షిక సదస్సు ప్రారంభం. మనుషులు, జంతువులు, పర్యావరణ ఆరోగ్యం పరస్పరం ముడిపడి ఉన్నాయని, వాటి సమగ్ర ఆరోగ్యానికి వన్ హెల్త్ విధానం ఎంతో కీలకమని పీవీ నరసింహారావు తెలంగాణ పశువైద్య విశ్వవిద్యాలయం ఉపకులపతి ప్రొఫెసర్ ఎం. జ్ఞాన ప్రకాష్ అన్నారు. రాజేంద్రనగర్లోని పీజేటీఏయూ ఆడిటోరియంలో పీవీఎన్ఆర్టీవీయూ, అసోసియేషన్ ఆఫ్ పబ్లిక్ హెల్త్ వెటర్నేరియన్స్ సంయుక్త ఆధ్వర్యంలో నిర్వహిస్తున్న 17వ ద్వైవార్షిక సదస్సు, అంతర్జాతీయ సింపోజియంను గురువారం ప్రారంభించారు.

One Health Conference Hyd: ఈ నెల 19, 20 తేదీల్లో రెండు రోజుల పాటు జరిగే ఈ సదస్సులో దేశ, విదేశాలకు చెందిన శాస్త్రవేత్తలు, వైద్య నిపుణులు, పరిశోధకులు పాల్గొన్నారు. భారత్ బయోటెక్ చీఫ్ డెవలప్మెంట్ ఆఫీసర్ డా. రాచెస్ ఎల్లా మాట్లాడుతూ వ్యాధుల నివారణలో టీకాల ప్రాధాన్యతను వివరించారు. భవిష్యత్తులో మహమ్మారులను ఎదుర్కోవడానికి విశ్వవిద్యాలయాలు, పరిశోధనా సంస్థలు, పరిశ్రమల మధ్య సమన్వయం అవసరమన్నారు. ఏపీహెచ్వీ అధ్యక్షుడు ప్రొ. సుభాశిష్ బటబ్యాల్ మాట్లాడుతూ జూనోటిక్ వ్యాధులు, యాంటీమైక్రోబియల్ రెసిస్టెన్స్ నియంత్రణకు వైద్య, పశువైద్య, పర్యావరణ నిపుణులు కలిసి పనిచేయాలని సూచించారు. ఈ సందర్భంగా ప్రజారోగ్య రంగంలో విశేష సేవలందించిన ప్రొ. సి. లత, ప్రొ. ఎస్.ఎన్. జోయార్దార్, డా. అర్ణబ్ సేన్, డా. ప్రజిత్లకు ఏపీహెచ్వీ ఫెలోషిప్లు, డా. ఆర్.పి. గర్గ్కు గౌరవ ఫెలోషిప్ అందజేశారు. కార్యక్రమంలో డీన్ ప్రొ. ఎం. ఉదయ కుమార్, రిజిస్ట్రార్ ప్రొ. ఎ. శరత్ చంద్ర, ఏపీహెచ్వీ ప్రధాన కార్యదర్శి ప్రొ. చంచల్ దేబ్నాథ్, అసోసియేట్ డీన్ ప్రొ. డి. మాధురి, నిర్వాహక కార్యదర్శి డా. ఎ. విజయ కుమార్ తదితరులు పాల్గొన్నారు.