తెలంగాణ రాష్ట్ర రోడ్డు రవాణా సంస్థ (RTC) విలీనంపై రాష్ట్ర ప్రభుత్వం కీలక నిర్ణయం తీసుకునే దిశగా అడుగులు వేస్తోంది. ఇప్పటికే ఈ అంశంపై ఉన్నత స్థాయి చర్చలు కొనసాగుతున్నాయని సమాచారం. రాష్ట్ర అవతరణ దినోత్సవమైన జూన్ 2న ప్రభుత్వం అధికారిక ప్రకటన చేసే అవకాశాలు కనిపిస్తున్నాయి.
ప్రస్తుతం ఏపీ రాష్ట్రంలో అమలులో ఉన్న విధానాన్ని పరిశీలిస్తున్న ప్రభుత్వం, అదే తరహాలో తెలంగాణ RTC ఉద్యోగులను ప్రభుత్వ ఉద్యోగులుగా గుర్తించే అంశాన్ని పరిశీలిస్తున్నట్లు తెలుస్తోంది. ఈ నిర్ణయం అమలైతే వేలాది RTC కార్మికులకు భారీ ఊరటనివ్వనుంది.
తెలంగాణలో ప్రస్తుతం సుమారు 37,360 మంది RTC కార్మికులు పనిచేస్తున్నారు. వీరికి ప్రభుత్వ ఉద్యోగుల హోదా కల్పిస్తే జీతభత్యాలు, ఉద్యోగ భద్రత, పదవీ విరమణ ప్రయోజనాల్లో మెరుగైన మార్పులు వచ్చే అవకాశం ఉందని ఉద్యోగ సంఘాలు అభిప్రాయపడుతున్నాయి.
అయితే RTC విలీనంతో ప్రభుత్వంపై అదనపు ఆర్థిక భారం పడే అవకాశముందని ఆర్థిక శాఖ అధికారులు అంచనా వేస్తున్నారు. ప్రతి సంవత్సరం సుమారు రూ.1000 కోట్ల వరకు అదనపు వ్యయం ఉండొచ్చని సమాచారం.
ఇప్పటికే ఈ వార్తపై RTC ఉద్యోగుల్లో ఆసక్తి నెలకొంది. ప్రభుత్వం తీసుకునే తుది నిర్ణయంపై అందరి దృష్టి నిలిచింది.
RTC విలీనంపై ప్రభుత్వం కీలక నిర్ణయం.. జూన్ 2న ప్రకటనకు ఛాన్స్